ចាប់ចោរឆក់យប់ម៉ិញបានហើយ! ប្តីប្រពន្ធរងគ្រោះដែលដេញតាមចោរ ត្រូវស្លាប់ទាំងពីរ ខណៈក្មេងរងគ្រោះ ត្រូវកំព្រាឪពុកម្តាយ

ភ្នំពេញ៖ ប្រភពព័ត៌មានបានឲ្យដឹងថា ចោរឆក់កាបូបម្នាក់ ដែលត្រូវ ២នាក់ប្តីប្រពន្ធជាជនរងគ្រោះ ជិះដេញតាម តែអកុសលស្លាប់ដោយសារបុកនឹងរថយន្ត ពេលនេះត្រូវចាប់ខ្លួនបានហើយ។

ហេតុការណ៍ដ៏ភ្ញាក់ផ្អើលនេះ បានកើតឡើងកាលពីវេលាយប់ថ្ងៃទី ២៨ មិថុនា ២០១៧ ស្ថិតនៅក្នុងសង្កាត់ដង្កោ ខណ្ឌដង្កោ។

សាក្សីនៅកន្លែងកើតហេតុ ឲ្យដឹងថា ស្ត្រីរងគ្រោះបានដួលបោកក្បាលស្លាប់ភ្លាមៗនៅនឹងកន្លែង ខណៈដែលបុរសជាប្តីរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ក៏បានស្លាប់បាត់បង់ជីវិតដែរ ចំណែកក្មេងរងគ្រោះជាកូនតូច បានរងរបួស និងពេលនេះត្រូវកំព្រាឪពុកម្តាយតាំងពីក្មេងថែមទៀត៕ វីដេអូខាងក្រោម៖

UPDATE:

- ជនញៀនថ្នាំម្នាក់ត្រូវឃាត់ខ្លួន ស្តីអំពីករណីលួច (ឆក់យកកាបូបស្ពាយ)

កាលពីថ្ងៃទី២៨-០៦-២០១៧ វេលាម៉ោង២១ម៉០០នាទី នៅចំណុចមុខសាលាបឋមសិក្សាភូមិឬស្សី ផ្លូវ២១៧ ភូមិ ឬស្សី សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ ។

-ជនសង្ស័យឈ្មោះ ផាន់ ម៉ុន ភេទ ប្រុស អាយុ ២៧ ឆ្នាំ មុខរបរ កម្មករលើកផ្លែឈើនៅផ្សារនាគមាស ស្នាក់នៅផ្ទះជួល ផ្លូវលំ ភូមិ ទួលពង្រ សង្កាត់ ចោមចៅ ខណ្ឌពោធិ៍សែនជ័យ រាជធានីភ្នំពេញ (ឃាត់ខ្លួន) ។

-ជរងគ្រោះជាប្តីឈ្មោះ មាន ពិសី ភេទ ប្រុស អាយុ ២៩ ឆ្នាំ មុខរបរ លក់ដូរ ស្នាក់នៅផ្ទះលេខ០៤(បុរីពិភពថ្មីចំការដូង) ផ្លូវ២១៧ សង្កាត់ដង្កោ ខណ្ឌ ដង្កោ រាជធានីភ្នំពេញ (ស្លាប់នៅពេលបញ្ជូនទៅដល់មន្ទីរពេទ្យ) ។

-ជរងគ្រោះជាប្រពន្ធឈ្មោះ ស្រី វត្តី ភេទ ស្រី អាយុ ២៨ ឆ្នាំ មុខរបរ លក់ដូរ ស្នាក់នៅផ្ទះលេខ០៤(បុរីពិភពថ្មីចំការដូង) ផ្លូវ២១៧ សង្កាត់ដង្កោ ខណ្ឌ ដង្កោ រាជធានីភ្នំពេញ (ស្លាប់នៅកន្លែងកើតហេតុ) ។

-ជរងគ្រោះជាកូនឈ្មោះ មាន ពេជ្រចរណៃ ភេទ ប្រុស អាយុ ០៣ ឆ្នាំ មុខរបរ នៅផ្ទះ ស្នាក់នៅផ្ទះលេខ០៤(បុរីពិភពថ្មីចំការដូង) ផ្លូវ២១៧ សង្កាត់ដង្កោ ខណ្ឌ ដង្កោ រាជធានីភ្នំពេញ (របួសធ្ងន់កំពុងសម្រាកព្យាបាលនៅមន្ទីរពហុព្យាបាលសួរគ៌ា) ។

-វត្ថុតាងចាប់យក ៖ ម៉ូតូ០១គ្រឿងម៉ាកសេ១២៥ ពណ៍ខ្មៅ សេរី២០១៥ ពាក់ស្លាកលេខ ភ្នំពេញ1BD 1334 (ជាមធ្យោបាយជនសង្ស័យជិះធ្វើសកម្មភាព) ។

-សម្ភារៈបាត់បង់ ៖ កាបូបស្ពាយចំនួន ០១ (ជារបស់ជនរងគ្រោះ) ។

-ដំណើររឿង៖ នៅមុនពេលកើតហេតុជនរងគ្រោះជាប្តីឈ្មោះ មាន ពិសី បានជិះម៉ូតូ០១គ្រឿងម៉ាក ហុងដាPCX ពណ៍ខៀវ ពាក់ស្លាកលេខ ភ្នំពេញ1DC 5728 ឌុបប្រពន្ធឈ្មោះ ស្រី វត្តី និងកូនប្រុសឈ្មោះ មាន ពេជ្រចរណៃ ទៅផ្ទះនៅបុរីពិភពថ្មីចំការដូង សង្កាត់ដង្កោ ខណ្ឌដង្កោ ដោយមានដាក់កាបូបស្ពាយ០១(មិនដឹងមានសម្ភារៈអ្វីក្នុងកាបូបទេ)នៅខាងមុខម៉ូតូ ហើយពេលមកដល់ចំណុចមុខសាលាបឋមសិក្សាភូមិឬស្សី ផ្លូវ២១៧ ភូមិ ឬស្សី សង្កាត់ ស្ទឹងមានជ័យ ខណ្ឌមានជ័យ រាជធានីភ្នំពេញ (ចំណុចកើតហេតុ) ស្រាប់តែមានជនសង្ស័យម្នាក់ឈ្មោះ ផាន់ ម៉ុន ជិះម៉ូតូ០១គ្រឿងម៉ាកសេ១២៥ ពណ៍ខ្មៅ សេរី២០១៥ ពាក់ស្លាកលេខ ភ្នំពេញ1BD 1334 បានធ្វើសកម្មភាពឆក់យកកាបូបស្ពាយរបស់ជនរងគ្រោះ ហើយជិះម៉ូតូគេចខ្លួនឆ្ពោះទៅស្ពានម័ល (អតីតស្ពានដែក) ពេលនោះជនរងគ្រោះជាប្តីឈ្មោះ មាន ពិសី ក៏បានបើកម៉ូតូដេញតាមពីក្រោយរហូតដល់មុខវត្តសំបួរមាស សង្កាត់ ដង្កោ ខណ្ឌ ដង្កោ ជនរងគ្រោះឈ្មោះ មាន ពិសី ក៏បានធាក់ម៉ូតូជនសង្ស័យឈ្មោះ ផាន់ ម៉ុន បណ្តាលឲ្យដួល ចំណែកម៉ូតូជនរងគ្រោះ បានជ្រុលចង្កូតទៅបុកជាមួយរថយន្ត០១គ្រឿងម៉ាកគាម៉ូនីង ពណ៍ស គ្មានស្លាកលេខ បណ្តាលឲ្យជនរងគ្រោះទាំង០២នាក់ប្តី.ប្រពន្ធ បានស្លាប់ ចំណែកកូនប្រុសរបួសធ្ងន់ត្រូវបានបញ្ជូនទៅព្យាបាលនៅមន្ទីរពហុព្យាបាលសួគារ៌ ក្នុងសង្កាត់ស្ទឹងមានជ័យ រីឯជនសង្ស័យឈ្មោះ ផាន់ ម៉ុន ត្រូវបានប្រជាពលរដ្ឋដេញ ចាប់បានព្រួតគ្នាវាយ ហើយបានយកទៅប្រគល់ឲ្យនគរបាលខណ្ឌដង្កោ បន្ទាប់មកនគរបាលខណ្ឌដង្កោ បានប្រគល់ជនសង្ស័យឈ្មោះ ផាន់ ម៉ុន មកឲ្យនគរបាលប៉ុស្តិ៍ស្ទឹងមានជ័យចាត់ការបន្តតាមនីតិវិធី ចំណែកកាបូបស្ពាយរបស់ជនរងគ្រោះបានជ្រុះបាត់តាមផ្លូវរកមិនឃើញ ។ បច្ចុប្បន្នជនសង្ស័យឈ្មោះ ផាន់ ម៉ុន ឃាត់ខ្លួននៅអធិការដ្ឋានដើម្បីកសាងសំណុំរឿង ។ Credit: Meng Vang